11 February 2010

गडांचा कोश

गड-किल्ल्याची भटकती करणाऱयांसाठी प्र. के. घाणेकर हे नाव अपरिचित नाही. गड, किल्ले, भटकंती, गर्यारोहण या विषयावरील त्यांची पन्नासहून अधिक पुस्तके प्रकाशित झाली आहेत. घाणेकर यांनी लिहिलेल्या पुस्तकांच्या नावावरुनच आपल्याला पुस्तकात काय असेल त्याची सहज कल्पना येऊ शकते. समर्थांचा सज्जनगड, महाराष्ट्र निसर्गदर्शन, जलदुर्गांच्या सहवासात, आडवाटेवरचा महाराष्ट्र, अथ तो दुर्गजिज्ञासा, गडदर्शन, मैत्री सागरदुर्गांशी ही त्यापैकी काही नावे. गाणेकर यांनी लिहिलेले साद सह्याद्रीची भटकंती किल्ल्यांची हे पुस्तक नुकतेच वाचनात आले. गड-किल्ले आणि भटकंतीची आवड असणाऱयांसाठी हे पुस्तक म्हणचे गडांचा कोश आहे. महाराष्ट्राच्या िविवध जिल्ह्यातील सुमारे १०० किल्ल्यांची सविस्तर माहिती, छायाचित्रे आणि नकाशे या पुस्तकात देण्यात आले आहेत. नेहमी भटकंती करणाऱयांना आणि हौस म्हणून कधीतरी गडांवर जाणाऱया मंडळींना हे पुस्तक अत्यंत उपयुक्त असे आहे.


सातारा जिल्ह्यातील अजिंक्यगडापासून सुरु होणारी सफर नगर जिल्ह्यातील हरिश्चंद्र गडापर्यंत येऊन थांबते, या वाचन सफरीत आपण जणू काही प्रत्यक्ष त्या किल्ल्यावर जाऊन येतो. गडाचा इतिहास, काही आख्यायिका, आठवणी, ऐतिहासिक महत्व, गड-किल्ल्याशी संबंधित  इतिहासातील व्यक्ती. त्या ठिकाणी कसे जायचे त्याची माहिती आणि काही नकाशे या पुस्तकात असल्यामुळे ते वाचनीय झाले आहे.


घाणेकर पुस्तकातील आपल्या मनोगतात म्हणतात, ट्रेकिंग म्हणून हिडणं सध्या बरचं बोकाळलाय. हौस म्हणून चार ठिकाणं पाहणं, शायनिंग म्हणून एखाद्या वेळी जाणं वेगळं. आणि तिथल्या गौरवशाली  इतिहासाचा एखादा क्षण जगण्यासाठी त्याच स्थळी जाऊन इतिहासाचा मागोवा घेत शिवस्मरण समाधीच्या आनंदात बुडून जाणं वेगळं. हा आनंद मी लुटला, तुम्ही लुटावा, असं मला वाटलं. म्हणून तुम्हाला खास आवतन. घेतला आनंद, वाटिला आनंद, यापरता आनंद, आणखी कोणता


घाणेकर यंनी आजवर महाराष्ट्र आणि महाराष्ट्राबाहेरील सुमारे तीनशे किल्ले पायी हिंडून पाहिले आहेत. किल्ले, हिमालय, निसर्ग, गिर्यारोहण, विज्ञान, भटकंती, पर्यंटन आदी विषयांवर आठशेहून अधिक लेख आणि पाचशेहून अधिक व्याख्याने दिली आहेत. या विषयावरील दहा हजार लेखांचा कात्रणसंग्रह व पुस्तके त्यांच्याकडे आहेत.  


ओघवत्या लेखनशैलीतून इतिहासाची करुन दिलेली ओळख यामुळे घाणेकर यांची सर्वच पुस्तके वाचनीय आणि संग्राह्य ठरली आहेत.


हे पुस्तक स्नेहल प्रकाशन (पुणे) यांनी प्रकाशित केले आहे. २७ नोव्हेंबर २००७ मध्ये या पुस्तकाची सहावी आवृत्ती प्रसिद्ध झाली.  स्नेहल प्रकाशनाचे संकेतस्थळ http://www.snehalprakashan.com/ असे आहे. (दूरध्वनी-०२०-२४४५२९११)

प्र. के, घाणेकर यांचा पत्ता
१०५, नारायण पेठ, पुणे-४११०३०
      

4 comments:

  1. छान माहिती दिलीत. घाणेकर साहेबांची सारीच पुस्तके वाचण्यासारखी आणि अनुभवण्यासाठी आहेत. त्यांची लिस्ट = http://goo.gl/FJ5N

    ReplyDelete
  2. भुंगा,
    आवर्जून दिलेल्या प्रतिसादाबद्दल आभार.

    ReplyDelete
  3. मस्त ,,,,,सुंदर ,,,, महेश कुलकर्णी

    ReplyDelete
  4. महेश
    नमस्कार
    आपल्या प्रतिसादाबद्दल आभार

    ReplyDelete